Mohabat...

Her shaks ki zindagi me mukhtalif qism ki priorities hoti hain... Jin k mutabiq wo apny shab o roz ko tarteeb deta hy....aur unhe k liay bhag dor bhi krta hy...fursat k lamhay mohabat krne k liay mukhtus hote hain...mohabat bheek ki trha khali kashkol me kuch dair itrati hy, ithlaati hy, phir murjhati hay aur sokhy pattay ki manind hawa me ur jati hy....kabhi idhert kabhi udher...kabhi kisi pair k neechay aa k churcharati hy....kabhi benam manzil ki traf belagaam hawa k saang chal prti hy....kisi khanabadoosh ki trha.....aik thikana nhi hota iska..... 

Fehmida Chaudhary

5 june 2014

Ujray howe log...

Ujray howe log, maslay howe gulab ki manind hote hain....masuck zada patiyaan dekhne me apni khobsurti kho deti hain pr inki khushboo der tak un qatil hathon se aati hy jo inhain masal k be shanakht kr dete hain...

Fehmida Chaudhary 

7th june 2014

Adhoori Auraat....

Ye jo sadyon se mere wajood me palta dukh meri raag o jaan ko kat raha hy...meri rooh ko chulni chulni kiye jata hay ik muddat sy...Be'zaar, Be'raang din, Be'Kaif ratain aur Be'maqsad hayyat hy...

Mere pass waqt he nhi apne liye, kai roz bad aaina bhi na dekhon to khud apne aapka aks bhi shanakht na ker paon...

Main apne din bhaar ki thaakaan apni rooh main utar leti hun...Udasi aur

bebasi berh jati hy aur tanhai ka ahsaas apni puri shiddat k saath 

hamla'awer hota hy...

Sakoot e shab k andhairon main jab sitary muskurate hain...meri ankgon k

kinaray aansoo'on se jhilmilatay hain...

Wafoor e qurb se alfaaz labon per he jhulus jate hain... adaigi ki nobat

tk pohanchtay he nhi...

Mujhay apne jeene k liye bhi saansaain derte derte dosron ki ijazat se mus'taar leni prti hain... Mera dil jab khoon k aansoo rota hy...meri nazrain kisi meherban ko dhondne dor tak jati hain aur phir khali khali lot aati hain...

Mere ander se phir khud he aik malamat ki sada aati hy....k...Ae bekhabber...TU...khud he apni zaat ki qatil hy...

Dil bhi bebasi ka aik jahan chupaye betha hy...jo kehta hy...Ya Rab meri hayyat k maani badal de...ya meri jalti howi rooh ki tapish se mere jism o jaan ko khaak'ster krde.....

Written by....
Fehmida Chaudhary
28 March 2014

Ravaiye

Teesri manzil ki khirki se roz bahar ka manzer dekhti hn.... Qareeb he had e nazar tk phaila howa haryali se muzaiyun shehr e khamoshan nazr ata hy.... pehle mitti ki dhairi c hoti hy phir sang e mar mar se us qabr ko saja dia jata hy... Mujhy hairani hy k zinda logon k saath murdon ka sa salook krne wale log... un k marne k bad unki qabr ki sajawat kr k tamam ter haqooq se muberrah ho jate hain...

Fehmida Chaudhary
30th March 2014

Ye duniya.......

Janay ab kis daes milaingay onchi zaaton walay log...

Naik nigahain, sachay jazbon ki sogaton walay log...

Waqt ki urti dhool main apnay naqsh ganwae phirte hain...

Rim jhim subhon, roshan shamon , resham raton walay log...

Ik bhikaran dhond rahi thi, raat ko jhootay chehron main...

Uljhay lafzon, sachi baton ki khairaton walay log...

Insaan ko ashraful makhloqat banaya gaya hay...Tamam jin o anus aur degar makhlooqat say afzal kaha jata hay k insan pehle bander ki terha dikhtay thay ...aur phir ahista ahista mosami tabdiliyon k sath banderon jaise dikhne walay insano ki shakl main dhalnay lagay.

Ajj ka insan dikhne main bohat khobsurat hay. Dil main kadorat , hasad ka jazba liye munafiqat se bharpur zindagi jee raha hay. Branded ushya kareedne wala aur aala 4 wheel drive main ghoomne wala, wasee lawn aur mehel numa ghar main rehnay wala . Her cheiz ka mayar parukhne wala insan khud aala mayaar ka insan nahi ban pata.

Burai hamaisha aik siyaah nuqtay say shuru hoti hay aur phir pori kaali raat main tabdeel ho jati hay. Isliye pehlay aik firoan tha aur ajj bohat say firoan hain...Apnay aas pass dekhlain.Jab khaloos khatum ho jata hay to saadgi rukhsat ho jati hay aur log takalufaat main per jatay hain. Aur apnay batin ko pakeeza bananay ki bajaye apnay zahir ko sajanay main lag jatay hain...

Written by : Fehmida Chaudhary

Muqadder soo bhi jatay hain.....

Kisi rothay howay dost ko manana asaan hay...Kisi bigray howay kaam ko sanwarna bhi mumkin hay magar baaz dafa muqadder rooth jatay hain...Aur rooth k so bhi jatay hain...Aur wo bhi gehri neend...Aur is gehri neend se jaganay ka na to koi manter hay aur na he koi ilaaj...

Koi minat simajat na he koi hilla bahana kariger hota hay....Bara he man moji hota hay ye muqader...Bigarta hay to sanwarnay ka naam he nahi laita...Narootha pan iski fitrat main jesay Allah nay likh dia do...

Bohat he kismat walay hotay hain wo log jo kismat k dhani hotay hain...Jo mitti ko bhi haath lagatay hain to wo sona ban jati hay...

Manzil tak pohanchnay k liye musalsal koshish ....Allah ki zaat pay mukammal yaqeen aur lagan honi chaheye....Bagair mehnat k koi cheiz hasil nahi ho sakti....Lagan...Justujo...Koshish....aur Khaliq e kainat per mukamal yakeen ....Her namumkin ko mumkin bana deta hay....

Rab raazi to sub raazi....Usko manana koi mushkil kam to nahi......


Written by Fehmida Chaudhary
!4th December 2015

Meray Alfaaz rotay hain.....

Kehnay ko to asan hay k dil o demagh ki tamam ter sochain aur batain kirtaas e safhay per muntaqil  kerna per is kaam ko anjaam dena utne he mushkil bhi hay...Dil o demagh ki lakhon batain likhtay likhtay kalam ki noak per aaker teher c jati hain...Aur baaz dafa ye batain seenay main he dum tor jati hain ....Aur inhain wajood main aanay se pehle he kafna dia jata hay....Alfaaz ki moat soch ki moat hay aur soch ki moat khud insaan ki roohani moat hay ....Soch ka nikhaar rooh ko nikharta hay aur rooh jab nikherti hay to chehray ki aab o taab aur nikhaar dekhnay se talluq rakhta hay....

Chehray per ul'howi chamak rooh ki pakeezgi aur alfaaz ki sachai say samnay aati hay...
Aur jab main sachay kharay lafzon ko kalam se safhay per bakhairti ho to aisa lagta hay k ye kaghaz geelay hain aur meray alfaaz rotay hain .....Aur inhain apnay ansoo'on se bheegotay hain....In alfaaz ki berson main nay apnay zehan k teh khanon may perwarish ki hay...Mujhay in se wesa he pyar hay jo ik maa ko apnay bachon say hota hay...Aur jab wo rotay hain to mera dil rota hay.....Per in k aansoo'on main ponchon bhi to bhala kesay....

Written on 10th December 2015

Kab....??? Kon ? Kisi ka hota hay....?

Dekha jaye to duniya main her shaks tanha hay laikin is zaum main mubtila bhi k ik zamanay hay mera...Jab k yahan per her shaks khud apnay he madaar main gardish ker raha hay ....Uski shuru'aat apni zaat say hoti hay aur khud apnay ap per aker he khatum ho jati hay ....wohi baqol shayer...

Her shaks khudi k aalam main bus apni khati jeeta hay.....

Hum insan jab say takhleeq howay hain ....Tijaraat k pay'shey se wabasta hain ...Hum lamhay lamhay main tijarat kertay hain ....Roz marrah zindagi main...Rishton main....Jazbon main...her jaga tijaraat he tijaraat ...Hum tijaraat bhi aisay kertay hain jese paidaishi tajir hon....

Hum pyar k badlay pyar mangtay hain ...nafrat k badlay nafrat ka he perchaar kertay hain...Qurbani detay hain tou phir dosron say apnay liye qurbani mangtay bhi hain ...Aur yehi wo waqt hota hay jab hamain pata chalta hay k yahan kon kisi ka hota hay ....Sub matlab parast aur matlabi hain aur us waqt hamain pata chalta hay k hum tanha he thay aur rahain gay....

Written on 5th December 2015

Khamoshiyaan bolti hain.....

Khamosh rehna aur kuch na kehna...khud dil he dil main apnay ap say batain kerna...khud he sawal kerna aur khud he jawab dena...Apnay ap se ulajhna aur khud he sare maslay ko hal kerlaina....khud ki khud say jang....khud he fateh aur khud he maftooh...Her guthi khud he uljhana aur khud he suljhana...

Bari munfarid si jang hay ye...Aur is jang ki ibtida to hay per inteha nahi....

Apni zaat ko pert der pert parukhna aur zaat ki her zaviye say nok palak sanwaarna koi asan kam to nahi...Janay kesay logon ko waqt milta hay dosron ki justujo aur aebjoi ka keh yahan to hamain khud ko khud dse he fursat nahi milti....

Achi hon ya buri hon jesi bhi hon main...
Main khudko nahi dekhti auron ki nazar say....

Sub kuch is faani duniya main he reh jana hay...Koi kisi k saath na jayega...sirf aur sirf niyat ka phal saath jayega...

Written on 3rd December 2015

Farq...

Ye bhi Rab k karam ki intiha hay k rizk Usne apnay hath rakha hay. Razik wohi hay jo Usko mantay hain aur wo Unko bhi deta hay jo Usko nahi mantay.... Jo agar rizk Allah insan k haath day daita to koi kisi ko khanay ko bhi na deta...Na he kisi dosray ko khatay dekh sakta...Log apnay liye godaam banwa k us me zakheera ker laitay... Aur koi bhooka marta hay tou unki ballah say....

Yehi fark hay Allah aur aam insan main...Wo Raheem o Kareem hay aur insaan zalim....Us Rab ko sab ki fikar hay kyoon k usay apni Khalkaat say pyar hay aur insan ko sirf aur sirf apnay ap say...Aur ye fark asmaan o zameen k fark k baraber hay....

Hum Allah Tallah se ye umeed rakhtay hain k Wo hamaray aebon ki pardaposhi karay ....Jab k hum khud dosron k aebon ki justujo main rahte hain....Hum her maumlay main Allah Tallah say maufi ki umeed rakhte hain aur khud itnay bukheel hotay hain k kisi apnay he jasay dosray insan ko mauf karnay k mauhtamil bhi nahi hotay...Allah malik hotay howay bhi mauf ker deta hay aur hum is jazbay say aari hain....

Written on 2nd December 2015

Zindagi zeher k amrit

Zindagi aik he baar milti hay aur aik he baar hum isay jeetay hain...kabhi hans ker kabhi roo ker ...aur kabhi kabhi khud ko zindagi k dharay per chor detay hain...hum logon se umeedain rakhtay hain aur unse he wabasta ye umeedain hamain torti hain ....Hum baar baar tottay hain aur phir wohi amal dhoratay hain....Jis se rujo kerna chaheye usi ko bhool bethte hain...wohi jo hamaray achay main hamain yaad nahi rehta wo hamaray buray main bhi hamain nahi chorta ...Us ki taraf palatne ki baat hay...jab wo haath tham leta hay tou hamain kisi aur saharay ki zaroorat rehti he nahi.....waseelay wo banata hay ...saharay bhi wohi deta hay...kabhi kisi sorat kabhi kisi...wo hamain kamzoor say bahadur bananay k is amal main hamari her tarah ki azmaishain bhi leta hay...per wo logon ki terha mukamal tor per hamain chor nahi deta...aik ungli wo hamaisha he thamay rakhta hay...k us ki mohabat ki garmi bhikray howay insan ko loo deti rahay....
isi loo per tap k kundan banta hay insan....

Rishta

Duniya ka sab se khoobsurat rishta wo hota hay jahan apas main ana ya main nahi hoti ... jahan fasla doriyan honay ki bawajood sirf aik muskurahat se ...sirf kisi aik k baat ker lainay se sub kuch pehlay jesa ho jata hay...log aisay logon ko pagal samajhtay hain ya aisa samajhtay hain k un me self respect he nahi hoti ...jab k aisa nahi hota... Jitni bari bari batain ki jain ....jisne nahi samajna nahi samajh paye ga...ye tab he samajh ata hay jab ap khud is amal se guzro...Hum khoobiyon walay shaks ko uski khoobiyon ki wajah se pasand kertay hain aur aisay shaks ko bura samajhtay hain jo apni khamiyan bayan kry....nadan log chamakti cheez ko sona samajhtay hain ...ajj wo dor hay jismay log apnay apko her terha say perfect samajhte hain aur dosron main khamiyan nikaltay hain.....tou azeem to wo howa na jo khud apni zaat k aib bayan kry...pagal logon ki mantaq bhi sirf pagal he samajh saktay hain.....